ہری پور: 12 سالہ عثمان کی موت کا معاملہ نیا رخ اختیار کر گیا، پوسٹ مارٹم رپورٹ سامنے آنے کے بعد تھانہ کوٹ نجیب اللہ میں قتل کی دفعہ 302 کے تحت مقدمہ درج کر لیا گیا ہے۔
پولیس کے مطابق پوسٹ مارٹم رپورٹ میں عثمان کی موت گلا دبانے کے نتیجے میں ہونے کی نشاندہی کی گئی ہے، جس کے بعد لواحقین کی جانب سے درج ایف آئی آر میں ایک شخص کو قتل کے الزام میں نامزد کیا گیا ہے۔
مقدمے کے اندراج کے بعد پولیس نے واقعے کی مزید تفتیش شروع کر دی ہے اور موت کے حالات و واقعات کا جائزہ لیا جا رہا ہے۔ تفتیشی حکام کی جانب سے شواہد، گواہوں کے بیانات اور دیگر متعلقہ پہلوؤں کی بنیاد پر واقعے کی حقیقت جاننے کی کوشش کی جا رہی ہے۔
عثمان کی موت کے اصل محرک اور واقعے میں نامزد شخص کے کردار کا تعین تفتیش کے بعد ہی ممکن ہوگا۔
واضح رہے کہ ایف آئی آر میں کسی شخص کی نامزدگی جرم ثابت ہونے کے مترادف نہیں، حتمی فیصلہ عدالت کرے گی۔
