مانسہرہ
تھانہ سٹی اور تھانہ صدر کی حدود میں شہریوں سے اسلحہ کے زور پر موبائل فون چھیننے کی متعدد وارداتوں میں ملوث ملزم کو مانسہرہ پولیس نے گرفتار کر لیا۔گزشتہ چند روز کے دوران گن پوائنٹ پر موبائل فون چھیننے کے کل چار واقعات رونما ہوئے، جن میں ایک مقدمہ تھانہ صدر اور دو مقدمات تھانہ سٹی میں درج کیے گئے۔
ڈی پی او مانسہرہ شفیع اللہ گنڈا پور کی خصوصی ہدایت پر پولیس نے جدید ٹیکنیکل وسائل بروئے کار لاتے ہوئے اور پیشہ ورانہ مہارت کا مظاہرہ کرتے ہوئے ملزم عبدالوہاب ولد قاری طاہر سکنہ چٹہ بٹہ کو گرفتار کر لیا۔ ملزم کے قبضے سے متاثرہ شہریوں سے چھینے گئے موبائل فون بھی برآمد کر لیے گئے،جبکہ اس کے دیگر سہولت کاروں اور ساتھی ملزمان کی گرفتاری کے لیے چھاپہ زنیوں اور مزید تفتیش کا سلسلہ بھی جاری ہے۔
