مانسہرہ لاری اڈہ میں آج فائرنگ کا ایک افسوسناک واقعہ پیش آیا۔جس میں دیرینہ دشمنی کی بنیاد پر ملزم بخت جمیل ولد عبدالرحمن سکنہ گوشالی نالہ کوہستان نے اندھا دھند فائرنگ کی، جس کے نتیجے میں محمد زر ولد قیمت زر سکنہ کوہستان شدید زخمی ہوا جو بعد ازاں ہسپتال میں زخموں کی تاب نہ لاتے ہوئے جاں بحق ہوگیا، جبکہ ایک ریڑھی بان بھی فائرنگ کی زد میں آ کر زخمی ہوا۔
واقعہ کی اطلاع ملتے ہی پولیس بروقت موقع پر پہنچی اور ایس ایچ او تھانہ لاری اڈہ فیصل خلیل کی سربراہی میں اے ایس آئی عامر محبوب اور دیگر ٹیم نے نہایت پیشہ ورانہ انداز میں کارروائی کرتے ہوئے ملزم کو الہ قتل و اقدام قتل سمیت گرفتار کرلیا،ملزم کے خلاف مقدمہ درج کرکے مزید تفتیش شروع کر دی گئی ہے۔
ڈسٹرکٹ پولیس آفیسر مانسہرہ شفیع اللہ گنڈا پور نے واقعہ پر سخت نوٹس لیتے ہوئے کہا کہ شہریوں کی جان و مال کا تحفظ پولیس کی اولین ترجیح ہے۔ ایسے عناصر جو معاشرتی امن کو نقصان پہنچاتے ہیں، انہیں قانون کے مطابق سخت انجام تک پہنچایا جائے گا۔
